#आपणो_राजस्थान_आपणी_राजस्थानी
============================
म्हारा आदरजोग मास्साब अर साथै पढणवाळा पढेसरियो,

आज रो दिन घणो मैताऊ है क्यूंक आज आपां गणतंत्र दिन मना रैया हां। 15 अगस्त नै आपणो देस आजाद होयो अर देस नै चलावण सारू अेक संविधान री जरूरत ही। 26 जनवरी 1950 रै दिन आपणो संविधान लागू होयो। आपणै देस मै राजतंत्र री जग्यां गणतंत्र री वैवस्था है। अेक बात म्हूं बताणी चाऊं कै आपां नै किताबां मै पढावै कै आपां अंग्रेजां रा 200 साल गुलाम रेया। पण आ बात सपा कूड़ी है। राजस्थान रा लोग कदी अंग्रेजां रा गुलाम कोनी रेया।
भारत मांय अंग्रेजां राज करयो पण राजस्थान मै देसी राजावां रो ई राज हो। आपणा देसभगतां देस नै आजाद करावण सारू कोई पाछ कोनी राखी। आप रा बेटा देस पर निछावर करया। आज बी रूंख सटै सिर कटावण री सीख आपणै राजस्थान मै ई मिलै। अेक हिरण री जान बंचावण सारू आपणो ईमान कोनी डोलै। आज बी सै सूं जादा आपणा जवान देस रै काम आवै। देस मांय 95% उद्योगपति राजस्थानी ई है। आजादी रै आंदोलन मांय मारवाड़ी लोगां घी दांई धन होम्यो। आजादी पछै जद जद बी देस मै आफत आई मारवाड़ी राजस्थानीयां तन मन अर धन सूं सागो दियो। सै सूं जादा टैक्स राजस्थानी ई देवै। राममिंदर मै 560 करोड़ सूं जादा धन राजस्थानीयां ई दियो है। राम मिंदर हुवै चाहे देस री संसद नींव मै लागेड़ा भाटा राजस्थानी ई है। म्हूं तो केवणो चाहूं हूं कै आपणै देस भारत री नींव मै ई राजस्थानी लोग लागेड़ा है। राजस्थानीयां बिना तो देस ई खोखळो है।
काळीबाई, डाळीबाई, हाडी राणी, अमरिता देवी, तेजोजी, जाम्भोजी, रामदेवजी, महाराणा प्रताप, महाराजा सूरजमल, भामाशाह, माता पन्ना, करणी माता जेड़ा लाखूं नाम है जिण रो नाम लेयां ई गुमेज हुवै। सगळै सापुरसां री मायड़ भासा राजस्थानी नै आज संविधान मै मानता नी होवणो घणै दुख री बात है।
राजस्थान कदी गुलाम हो इज कोनी पण देस नै आजाद करावण सारू आपरो भोत किं बलिदान करणो पड़्यो। आजादी देस नै मिली पण भासा री गुलामी राजस्थान नै मिली। 16 करोड़ राजस्थानी बोलणियां री जबान पर ताळो सन 1956 मै लाग्यो जद राजकाज री भासा राजस्थानी री जग्यां हिंदी करीजी।

75 बरस री हुई आजादी, घर घर इमरत बरसै।
निरभागी सगळा राजस्थानी जका मायड़ भासा नै तरसै।

आओ आपां राजस्थानी नै बरत्यूं री भासा बणार पैलपोत खुद मानता देवां। आपणै संविधान मांय 22 भासावां नै मानता है पण सै सूं बडै बलिदानी राजस्थान री मायड़ भासा राजस्थानी नै संविधान मै कोई जग्यां कोनी। संविधान री आठवीं पानड़ी मांय राजस्थानी नै दर्ज करो अर राज्य सरकार राजस्थानी नै पैली राजभासा बणावै जद ई राजस्थानीयां रै बलिदान रो सम्मान होसी।

राजस्थान अर राजस्थानी नै मानता देवो।
राजस्थानीयां अर बलिदानीयां नै मानता देवो।


आपणो राजस्थान
आपणी राजस्थानी
जै हिंद।