राजस्थान रा मुख्यमंत्री अशोक गहलोत माली साल 2022-23 रो बजट पेश कीनो- पैली दफ़ा खेती-बाड़ी सारु न्यारो बजट पेश करी ज्यो।
मुख्यमंत्री अशोक गहलोत आज राज्य रो माली साल 2022-23 रो बजट पेश कीनो। वे पहली दफ़ा खेती-बाड़ी सारु न्यारो बजट पेश कीनो। बजट मांय रोजगार सारु केई ऐलाण करी ज्या। बजट मांय शहरां मांय रोजगार मुहैया करावण सारु इंदिरा गांधी शहरी रोजगार गारंटी योजना रो ऐलाण करी ज्यो। राज्य सरकार मांय न्यारा-न्यारा एक लाख ओहदां माथे भर्ती करी जावेला।
बजट मांय स्वास्थ्य रा हलका सारु ई केई ऐलाण करी ज्या। मुख्यमंत्री चिरंजीवी स्वास्थ्य बीमा योजना रा तैत हर पिरवार रा बीमा कवर री रकम 5 लाख रुप्या ऊं बधा र 10 लाख रुप्या करण रो ऐलाण करी ज्यो। बजट मांय महिलावां मांय कैंसर रा ईलाज सारु मोबाइल कैंसर डाइग्नोस्टिक वैन चलावण सारु 50 करोड़ रुप्या रो प्रावधान करी ज्यो। मुख्यमंत्री सरकारी अस्पतालां मांय ओ.पी.डी. अर आई.पी.डी. मुफ्त करण रो ऐलाण कीनो। वे जयपुर रा सवाई मान सिंह अस्पताल मांय रोबोटिक सर्जरी रो सुबीतो मुहैया करावण रो ऐलाण ई कीनो।
बजट भाषण मांय शिक्षा रा हलका ऊं जुड़्या केई ऐलाण करी ज्या। प्रदेश रा शहरी अर गांवाई हलकां मांय अंग्रेजी माध्यम री एक-एक हज़ार महात्मा गांधी स्कूलां खोलण रो ऐलाण ई करी ज्यो। मुख्यमंत्री आं स्कूलां सारु 10 हज़ार शिक्षकां री भर्ती रो ऐलाण ई कीनो। मुख्यमंत्री राज्य री 3 हज़ार 820 स्कूलां ने सीनियर सेंकेंड्री स्कूलां मांय क्रमोन्नत करण रो ऐलाण ई कीनो। वे जयपुर रा जवाहर लाल नेहरु मार्ग माथे बण्या शिक्षा संस्थानां ने एज्यूकेशन हब रा तौर ऊं विकसित करण रो ऐलाण कीनो। ईं सागे ई ग्राम पंचायत मुख्यालयां री प्राइमरी स्कूलां ने मिडिल स्कूलां मांय अर मिडिल स्कूलां ने सैंकंडरी स्कूलां मांय क्रमोन्नत करण रो ऐलाण ई करी ज्यो। वे 25 कन्या महाविद्यालयां मांय नुवा संकाय खोलण रो ऐलाण ई कीनो। श्री गहलोत मुख्यमंत्री अनुप्रति कोचिंग योजना रो दायरो बधावण रो ऐलाण ई कीनो। ईं रे अलावा हर ज़िला मांय 50-50 लाख रुप्या रा खर्च ऊं सावित्री बाई फुले वाचनालय खोलण रो ऐलाण ई करी ज्यो ।
बजट मांय शुद्ध के लिए युद्ध अभियान रा तैत डायरेक्ट्रेट ऑफ़ फूड सेफ्टी मांय 200 खाद्य सुरक्षा अहलकारां री भर्ती रो ऐलाण ई करी ज्यो। बजट मांय 32 नुवा औद्योगिक हलका बणावण अर मल्टी स्टोरी इण्डस्ट्रियल कॉम्प्लेक्स बणावण रो ऐलाण ई करी ज्यो। मुख्यमंत्री प्रदेश रा सगळा जिलां मांय 3-3 खास सड़कां री मरम्मत करावण रो ऐलाण कीनो। ईं काम माथै 3 हजार एक सौ तैंतीस करोड रूप्या रा खर्चा रो प्रावधान करी ज्यो। मुख्यमंत्री राज्य रा शहरी हलकां मांय 1 हजार 2 सौ करोड़ रूप्या रा खर्च ऊं सड़कां रा विकास रो प्रस्ताव ई कीनो। बजट मांय पैरालम्पिक मांय देश सारू तमगा जीतण वाळां ने ई ओलंपिक पदक विजेतावां री भांत 25 बीघा खेतीहर जमीं देवण रो ऐलाण करी ज्यो। ईं रे अलावा पैरा खिलाड़ियां ने आला दर्जा री सिखावण देवण रा मकसद ऊं जयपुर अर जोधपुर मांय पैरा खेल अकादमी बणावण रो ऐलाण ई बजट मांय करी ज्यो।
